好少提及我既狗狗安安, 但其實我地好錫佢!

係BeBe死後半年, 我地係同一間狗店帶左兩個幾月大既

安安番黎, 佢真係好可愛! 我地一家人整日都圍住佢要同佢玩,

不過好不幸三日後佢就病左!

佢不斷咁嘔, 完全食唔到野, 好自然打電話番狗店求救,

老板娘係一個負責任既人, 連夜同我抱左安安番去,

佢每日都會報告安安既情況, 兩日後佢同我地講話

安安好反覆, 時好時壞, 不如換過隻比我地!

我地一聽到好驚, 問佢其實安安係咪死左!

佢話唔係, 同左我地去探安安. 

睇見細細隻既安安真係病緊都好可愛,

雖然我地同佢相處左只係三日, 但佢都認得我地,

猛搖條尾仔!

我地同老板娘講, 如果佢無把握醫好安安,

我地要帶走佢去睇獸醫. 咁佢話知道我地好錫狗狗,

我地點對BeBe佢好清楚, 佢唔係無把握,

而係即使安安好番, 佢既腸胃都唔會好,

佢識左我地咁耐, 想換隻健康既比我地!

我地話無論點我地都唔會放棄安安!

就係咁每兩日我地都去探安安, 過左兩星期,

安安終於再番到屋企!!

每日我地番左工都剩得媽媽同安安, 我唔想佢咁寂寞,

於是決定幫佢搵個伴!係佢一歲生日後,

我同一時間帶左樂樂, 精精同叻叻番黎!

從無諗過一下子養咁多隻狗狗, 真係緣份!

我地本來去睇一隻BB.但叻叻同樂樂,

一見到我地就好嗲咁痴住我地要抱抱,

個breeder話咁不如要左佢地, 因為佢將要移民,

都打算同佢地搵過主人, 不過佢話要帶埋精精,

因為當時精精剛流產, 又剃晒D毛, 唔靚好難賣.

佢話要就三隻一齊買. 於是, 我家就有安安,

樂樂, 精精同叻叻喇!

安安係一隻好純既狗狗, 雖然佢係大哥, 但好讓D細既,

係所有狗狗當中, 佢係最懂性, 最乖, 不過亦係最細膽!

佢既腸胃真係好差, 仲要一受驚嚇就肚屙,

行雷, 甚至人家裝修既電鑽聲都足以令佢發病!

醫生話無辦法, 叫我可選擇長期餵鎮靜劑,

佢已經生骨刺, 要食補充品, 依家年老氣管唔好,

又要食擴張氣管藥, 我真係唔想比咁多藥物佢!

無風無浪, 無人裝修, 小心飲食, 佢都OK既,

一有風吹草動, 真係我仲驚過佢!